ເປີດນຳໃຊ້ສູນຝຶກອົບຮົມເຕັກນິກກະສິກໍາ ແລະ ພັດທະນາຊົນນະບົດ ລາວ – ເກົາຫຼີ

ວັນທີ 6 ພະຈິກ 2018 ໄດ້ມີພິທີເປີດນຳໃຊ້ສູນຝຶກອົບຮົມເຕັກນິກກະສິກຳ ແລະ ພັດທະນາຊົນນະບົດ ລາວ-ເກົາຫຼີ ຢ່າງເປັນທາງການ, ທີ່ບ້ານດອນຕິ້ວ ເມືອງໄຊທານີ ນະຄອນຫຼວງວຽງຈັນ, ໂດຍເປັນກຽດເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ປະທານກວດກາສູນກາງພັກ, ອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີທ່ານ ຊິນ ຊອງ ຊຸນ (Shin Sung Soon) ເອກອັກຄະລັດຖະທູດ ສ.ເກົາຫຼີ ປະຈຳລາວ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ກ່າວວ່າ: ສູນຝຶກອົບຮົມເຕັກນິກກະສິກຳ ແລະ ພັດທະນາຊົນ ນະບົດ ລາວ-ເກົາຫຼີ ເປັນການຊ່ວຍເຫຼືອຂອງລັດຖະບານ ແລະ ປະຊາຊົນ ສ.ເກົາຫຼີ ທີ່ໄດ້ຊ່ວຍທາງດ້ານທຶນຮອນ ແລະ ວິຊາການໃຫ້ແກ່ໂຄງການພັດທະນາຊົນນະບົດແບບມີສ່ວນຮ່ວມຕາມຫຼັກ ແຊມວນອຸນດົງ ແລະ ທິດນຳ 3 ສ້າງ, ໃນນັ້ນ ແມ່ນມີການກໍ່ສ້າງສູນຝຶກອົບຮົມເຕັກນິກກະສິກຳ ແລະ ພັດທະນາຊົນນະບົດ ລາວ-ເກົາຫຼີ, ເຊີ່ງມີມູນຄ່າການກໍ່ສ້າງ 3,000,000 ກວ່າໂດລາສະຫະລັດ, ສູນດັ່ງກ່າວແມ່ນມີຫົວໜ່ວຍຂັ້ນສອງຂື້ນກັບກະຊວງກະສິກຳ ແລະ ປ່າໄມ້, ມີສາຍວິຊາການຂື້ນກັບ ກົມສົ່ງເສີມເຕັກນິກ ແລະ ປຸງແຕ່ງກະສິກຳ ເຊຶ່ງເປັນສູນໃຫ້ບໍລິການຝຶກອົບຮົມດ້ວຍຮູບແບບຄົບຊຸດແຫ່ງໜຶ່ງໃນລາວ, ສູນດັ່ງກ່າວຈະຮັບໃຊ້ວຽກງານໃນການກໍ່ສ້າງຂີດຄວາມສາມາດໃຫ້ແກ່ບຸກຄະລາກອນຂອງພາກລັດ, ເອກະຊົນ ແລະ ຜູ້ນໍາຊຸມຊົນ ປະກອບສ່ວນເຂົ້າໃນການພັດທະນາຊົນນະບົດໃໝ່, ລຶບລ້າງຄວາມທຸກຍາກ, ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນເທື່ອລະກ້າວ. ສູນແຫ່ງນີ້ ນອກຈາກຈະເປັນບ່ອນຝຶກອົບຮົມຫຼໍ່ຫຼອມທາງດ້ານຈິດສຳນຶກທີ່ຖືກຕ້ອງ ແລະ ຖ່າຍທອດຄວາມຮູ້ດ້ານວິຊາການໃຫ້ແກ່ຊາວບ້ານເປົ້າໝາຍຂອງໂຄງການໃນ 2 ແຂວງ (ວຽງຈັນ ແລະ ສະຫວັດນະເຂດ) ແລ້ວຍັງເປັນສູນທີ່ບໍລິການດ້ານການຝຶກອົບຮົມທີ່ໄດ້ມາດຕະຖານຄົບຊຸດ, ເວົ້າລວມແລ້ວ ສູນຝຶກອົບຮົມແຫ່ງນີ້ ຈະເປັນເຄື່ອງມືທີ່ສຳຄັນໃນການຜັນຂະຫຍາຍຍຸດທະສາດ ການພັດທະນາຂະແໜງກະສິກຳ-ປ່າໄມ້ ແລະ ພັດທະນາຊົນນະບົດແກ້ໄຂຄວາມທຸກຍາກໃຫ້ປະກົດຜົນເປັນຈິງ, ປະກອບສ່ວນໃນການພັດທະນາເສດຖະກິດ-ສັງຄົມ ຄັ້ງທີ 8 ໂດຍສະເພາະ ວຽກງານພັດທະນາຊົນນະບົດ ແລະລຶບລ້າງຄວາມທຸກຍາກຂອງລັດຖະບານ. ທ່ານ ຄຳພັນ ເໝືອນສິດທິດາ ຫົວໜ້າຫ້ອງການກະຊວງກະສິກຳ ແລະປ່າໄມ້ ກ່າວວ່າ: ສູນຝຶກອົບຮົມເຕັກນິກກະສິກຳ ແລະພັດທະນາຊົນນະບົດ ລາວ-ເກົາຫຼີ ເປັນສູນຫົວໜ່ວຍຂັ້ນທີສອງ ທີ່ຂຶ້ນກັບກະຊວງກະສິກຳ ແລະ ປ່າໄມ້, ມີສາຍວິຊາການຂຶ້ນກັບກົມສົ່ງເສີມເຕັກນິກ ແລະ ປຸງແຕ່ງກະສິກຳ, ສູນແຫ່ງນີ້ໄດ້ຮັບການສ້າງຕັ້ງຂຶ້ນໃນປີ 2016 ດ້ວຍມູນຄ່າໃນ ການກໍ່ສ້າງທັງໝົດ 3 ລ້ານກວ່າໂດລາ ຫຼື ປະມານ 25 ຕື້ກວ່າກີບ, ເປັນທຶນຊ່ວຍເຫຼືອ ຂອງລັດຖະບານ ສ.ເກົາຫຼີ ເພື່ອມອບເປັນຂອງຂວັນຈາກປະທານາທິບໍດີ ສ.ເກົາຫຼີ ມອບໃຫ້ປະທານປະເທດແຫ່ງ ສປປລາວ ໃນປີ 2012, ທັງເປັນສັນຍາລັກສາຍພົວພັນຮ່ວມມືຂອງລັດຖະບານສອງປະເທດ, ທີ່ມີຈຸດປະສົງເພື່ອພັດທະນາບຸກຄະລາກອນໃຫ້ແກ່ຂະແໜງກະສິກໍາ-ປ່າໄມ້ ແລະ ພັດທະນາຊົນນະບົດ, ການນຳຂັ້ນບ້ານ ແລະ ຊາວກະສິກອນລາວ, ຜູ້ປະກອບການກະສິກຳໃນຂອບເຂດທົ່ວປະເທດໃນຮູບແບບການພັດທະນາຊົນນະບົດແບບປະສົມປະສານ ແລະມີສ່ວນຮ່ວມຂອງປະຊາຊົນ ຕາມຫຼັກແຊມວນ ອຸນດົງ ແລະຕາມນະໂຍບາຍ 3 ສ້າງ, ເປັນສູນທີ່ໄດ້ຮັບການພັດທະນາດ້ານພື້ນຖານໂຄງລ່າງເຊັ່ນ: ອາຄານ, ຫໍພັກນັກສຳມະນາກອນ, ຫ້ອງອາຫານ, ຫ້ອງສະໝຸດ, ສວນສາທິດການຮຽນຮູ້ວິຊາການ ການປູກຫຍ້າລ້ຽງສັດ, ປູດພືດ-ຜັກໃນເຮືອນຮົ່ມ ແລະ ຈຸດປະສານງານດ້ານການຖ່າຍທອດເຕັກນິກກະສິກຳ, ການພັດທະນາຊົນນະບົດຂອງກະຊວງກະສິກຳ ແລະ ປ່າໄມ້ ຢູ່ຂັ້ນແຂວງໄດ້ມີການພັດທະນາແບບມີສ່ວນຮ່ວມໃນສອງແຂວງ ລວມມີ 6 ເມືອງ ແລະ 30 ບ້ານ, ທີ່ສຳຄັນ ສູນແຫ່ງນີ້ຍັງເປັນສູນທີ່ຈະສ້າງແນວຄິດໃຫ້ປະຊາຊົນເປັນເຈົ້າຕົນເອງ, ຊ່ວຍຕົນເອງ, ມີຄວາມສາມັກຄີພາຍໃນໃຫ້ໜັກແໜ້ນ, ສ້າງຈິດໃຈປະຢັດມັດທະຍັດ, ພັດທະນາຊຸມຊົນດ້ວຍການສ້າງສະພາບແວດລ້ອມທີ່ດີ, ນຳໃຊ້ເຕັກນິກໃໝ່ທີ່ເໝາະສົມເຂົ້າໃນການຜະລິດກະສິກຳ.

ກວດແກ້ໂດຍ: ພະແນກຂໍ້ມູນຂ່າວສານການສົ່ງເສີມ