ພະແນກ ຂໍ້ມູນຂ່າວສານການສົ່ງເສີມ ແລະ ເຊື່ອມໂຍງຕະຫຼາດ

ໜ້າທີ່

ຜັນຂະຫຍາຍແຜນຍຸດທະສາດການພັດທະນາ ວຽກສົ່ງເສີມກະສິກໍາ ແລະ ສະຫະກອນ ຂອງກົມ ເປັນແຜນ ການ ແລະ ໂຄງການລະອຽດ ເພື່ອຈັດຕັ້ງປະຕິບັດ ຕາມບົດບາດໜ້າທີ່ຂອງຕົນໃຫ້ປະກົດຜົນເປັນຈິງ;
ເກັບກຳ, ສັງລວມ ບັນດາບົດຮຽນດີເດັ່ນໃນການຜະລິດ, ການດໍາເນີນທຸລະກິດກະສິກຳ ຂອງຜູ້ປະກອບການ, ຟາມ, ຄອບຄົວ, ກຸ່ມ ແລະ ສະຫະກອນ ຕົວແບບ ເພື່ອສ້າງເປັນຄັງຄວາມຮູ້, ຂໍ້ມູນຂ່າວສານ ພ້ອມທັງສ້າງເປັນຕາໜ່າງການສົ່ງເສີມ ແລະ ການກະຈາຍບົດຮຽນອອກສູ່ວົງກວ້າງ;
ສ້າງຖານຂໍ້ມູນຂ່າວສານການສົ່ງເສີມໃນຮູບແບບຄູ່ມື, ວາລະສານ, ແຜ່ນພັບ, ໂພສເຕີ ແລະ ສື່ດີຈີຕ໋ອນ ເພື່ອໂຄສະນາເຜີຍແຜ່ ໃຫ້ທົ່ວເຖິງ ແລະ ກວ້າງຂວາງ;
ອອກແບບຫຼັກສູດ ແລະ ສ້າງຄູຝຶກດ້ານການສົ່ງເສີມບໍລິການເຕັກນິກ ໃຫ້ແກ່ພະນັກງານຂອງກົມ, ສູນ, ສະຖານນີບໍລິການເຕັກນິກ ແລະ ວິຊາການບ້ານ ພ້ອມທັງປະສານງານກັບບັນດາກົມວິຊາການທີ່ກ່ຽວຂ້ອງ ເພື່ອໃຫ້ມີເຄືອຂ່າຍການສະໜອງ, ຖ່າຍທອດຄວາມຮູ້ວິຊາການສະເພາະດ້ານກ່ຽວກັບ ການປູກ, ການລ້ຽງ, ປຸງແຕ່ງ, ການສ້າງແຜນທຸລະກິດກະສິກໍາ, ການຕະຫຼາດ ແລະ ການຈັດຕັ້ງກໍາລັງການຜະລິດ;
ສ້າງຂີດຄວາມສາມາດ ໃຫ້ແກ່ພະນັກງານສົ່ງເສີມກະສິກໍາ, ສູນ, ສະຖານີບໍລິການເຕັກນິກ, ອົງການຈັດຕັ້ງຊາວກະສິກອນ ແລະ ຜູ້ປະກອບກິດຈະການທຸລະກິດກະສິກໍາໄວໜຸ່ມ ດ້ວຍການຝຶກອົບຮົມ, ທັດສະນະສຶກ ສາ, ແລກປ່ຽນບົດຮຽນ, ການປະຕິບັດຕົວຈິງ ແລະ ການສ້າງເຄືອຂ່າຍ ລະຫວ່າງ ສູນ, ສະຖານີບໍລິການເຕັກນິກກະສິກໍາ;
ສົ່ງເສີມການຄັດແຍກ, ຈັດເກຣດ, ຫຸ້ມຫໍ່ ແລະ ການສ້າງຜະລິດຕະພັນເອກະລັກຂອງທ້ອງຖິ່ນ ໃຫ້ໄດ້ຕາມຄວາມຕ້ອງການຂອງຕະຫຼາດ; ຊຸກຍູ້ການຜະລິດເປັນສິນຄ້າໃນຮູບແບບສັນຍາທີ່ເປັນທໍາ ລວມທັງສ້າງເງື່ອນໄຂເອື້ອອຳນວຍການສ້າງຍີ່ຫໍ້ກາໝາຍສິນຄ້າກະສິກຳ;
ສ້າງກົນໄກເຊື່ອມໂຍງການຕະຫຼາດ, ການຮ່ວມສໍາພັນເສດຖະກິດ ດ້ວຍການກໍານົດຫຼັກການ, ລະບຽບການ, ສ້າງຄູ່ມື ແລະ ຂໍ້ແນະນໍາ ເພື່ອເອື້ອອໍານວຍໃຫ້ຫົວໜ່ວຍການຜະລິດ, ກຸ່ມ, ສະຫະກອນ, ຟາມ, ເຄືອຂ່າຍຊາວກະສິກອນ ແລະ ຜູ້ປະກອບການ ຈັດຕັ້ງປະຕິບັດແຜນທຸລະກິດ ໄດ້ຢ່າງຄ່ອງຕົວ;
ສ້າງກົນໄກພົບປະແລກປ່ຽນບົດຮຽນ ລະຫວ່າງຜູ້ຜະລິດ, ຜູ້ປະກອບການ ແລະ ນັກວິຊາການ ດ້ວຍການຈັດງານ ວາງສະແດງສິນຄ້າ, ການປະກວດຜະລິດຕະພັນ ແລະ ການສໍາມະນາວິຊາການ ໃຫ້ກວ້າງຂວາງ;
ປະສານງານ, ຮ່ວມມືກັບອົງການຈັດຕັ້ງທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ເພື່ອຍາດແຍ່ງການຊ່ວຍເຫຼືອທາງດ້ານງົບປະມານ ແລະ ເຕັກນິກວິຊາການ ບົນພື້ນຖານການຕົກລົງເຫັນດີຂອງກົມ;
ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ, ລະບຽບການ ແລະ ຕາມການມອບໝາຍຂອງກົມ.