ສູນພັດທະນາກະສິກຳ ໜອງແດງ (ແຂວງສາລະວັນ)

ໜ້າທີ່

ຜັນຂະຫຍາຍແຜນຍຸດທະສາດການພັດທະນາ ວຽກສົ່ງເສີມກະສິກໍາ ແລະ ສະຫະກອນຂອງກົມເປັນແຜນ ການ ແລະ ໂຄງການລະອຽດ ເພື່ອຈັດຕັ້ງປະຕິບັດ ຕາມບົດບາດໜ້າທີ່ຂອງຕົນໃຫ້ປະກົດຜົນເປັນຈິງ;
ສົ່ງເສີມການນຳໃຊ້ຜົນສຳເລັດທາງດ້ານວິທະຍາສາດ, ອຸປະກອນກົນຈັກກະສິກຳ, ວິທີການກະເສດສຸມ ແລະ ແບບປະສົມປະສານ ເພື່ອຍົກສະມັດຖະພາບ, ຄຸນນະພາບຂອງຜົນຜະລິດ ແລະ ມີໂພຊະນາການຕາມຫຼັກການກະສິກໍາສະອາດ, ປອດໄພ ແລະ ເປັນມິດຕໍ່ສິ່ງແວດລ້ອມ;
ຝຶກອົບຮົມ ແລະ ສາທິດ ເຕັກນິກ, ເຕັກໂນໂລຊີ, ນະວັດຕະກໍາ ແລະ ທັກສະກະສິກຳສະໄໝໃໝ່ ເຂົ້າໃນການປູກ, ການລ້ຽງ ແບບປະສົມປະສານ ຕາມຫຼັກການກະສິກໍາສະອາດ; ການອົບ, ຕາກ, ຄັດແຍກ, ຈັດເກຣດ, ຫຸ້ມຫໍ່ ເພື່ອສ້າງມູນຄ່າເພີ່ມ ແລະ ການຕະຫຼາດ ໃຫ້ແກ່ຊາວກະສິກອນ, ກຸ່ມຜູ້ຜະລິດ, ກຸ່ມປຸງແຕ່ງ ແລະ ຜູ້ປະກອບການທຸລະກິດກະສິກໍາ ລວມທັງຮ່ວມຈັດງານວາງສະແດງສິນຄ້າກະສິກໍາ;
ສົ່ງເສີມການຈັດຕັ້ງເປັນ ກຸ່ມ, ຟາມ ແລະ ຫົວໜ່ວຍທຸລະກິດກະສິກໍາ ແບບຜູກພັນຕາມສັນຍາ ໃຫ້ເປັນຂະບວນກວ້າງຂວາງ ກ້າວໄປສູ່ການສ້າງເປັນສະຫະກອນ ຫຼື ເປັນຫົວໜ່ວຍເສດຖະກິດຮ່ວມມື ໃນຮູບແບບຕ່າງໆ ໃຫ້ມີຄວາມເຂັ້ມແຂງເພື່ອປັບປຸງການຜະລິດເປັນສິນຄ້າພາຍໃນ ແລະ ທົດແທນການນຳເຂົ້າ, ເປັນສະບຽງອາຫານ-ໂພຊະນາການ ໃຫ້ມີຄຸນນະພາບ;
ສ້າງຄວາມຂີດຄວາມສາມາດຂອງນັກສົ່ງເສີມ ຂັ້ນເມືອງ, ສະຖານີບໍລິການເຕັກນິກກະສິກຳ ແລະ ວິຊາການບ້ານ ໃຫ້ມີຄວາມເຂັ້ມເເຂງ ໃນການປະຕິບັດວຽກສາທິດ, ຝຶກອົບຮົມ, ການຖ່າຍທອດບໍລິການເຕັກນິກ ການປູກ, ການລ້ຽງ, ການປຸງແຕ່ງ ແລະ ການຕະຫຼາດ; ວິທີການສ້າງຕັ້ງ ແລະ ຄຸ້ມຄອງ ກອງທຶນ; ການຈັດທັດ ສະນະສຶກສາແລກປ່ຽນບົດຮຽນ;
ຜະລິດແນວພັນເຂົ້າລຸ້ນສາມ, ແນວພັນ ພືດ, ສັດ ແລະ ສັດນໍ້າ ພ້ອມທັງຊຸກຍູ້ສົ່ງເສີມການຜະລິດ ແລະ ນໍາໃຊ້ແນວພັນດັ່ງກ່າວໃຫ້ກວ້າງຂວາງ ເພື່ອຕອບສະໜອງການແນວພັນໃຫ້ແກ່ຜະລິດສິນຄ້າຮັບໃຊ້ພາຍໃນທົດແທນການນໍາເຂົ້າ ແລະ ຜະລິດສິນຄ້າທີ່ມີຕະຫຼາດ ມີສັນຍາແລ້ວເພື່ອສົ່ງອອກ ດ້ວຍການປະສານສົມທົບກັບ ພະແນກກະສິກໍາ ແລະ ປ່າໄມ້ແຂວງ, ບັນດາຫ້ອງການກະສິກໍາ ແລະ ປ່າໄມ້ເມືອງ, ນະຄອນ ແລະ ພາກສ່ວນກ່ຽວຂ້ອງ ເພື່ອຂະຫຍາຍຕາໜ່າງການຜະລິດແນວພັນ ຂອງຄອບຄົວ, ຟາມ, ຫົວໜ່ວຍທຸລະກິດ, ກຸ່ມ, ສະຫະກອນ ໃຫ້ຖືກຕ້ອງຕາມຂະບວນການ, ຂັ້ນຕອນດ້ານວິຊາການ ແລະ ມີຕາໜ່າງການກວດສອບ, ຢັ້ງຢືນຄຸນນະພາບແນວພັນ;
ເກັບກໍາຂໍ້ມູນ ບັນດາພື້ນຖານໂຄງລ່າງ, ເຄື່ອງມືອຸປະກອນດ້ານເຕັກນິກ ແລະ ສັງລວມບັນດາບົດຮຽນດີເດັ່ນ ໃນການຜະລິດ, ການປຸງແຕ່ງ ແລະ ການຕະຫຼາດ ຂອງບັນດາຟາມ, ຄອບຄົວ, ກຸ່ມ, ສະຫະກອນ, ຫົວໜ່ວຍທຸລະກິດກະສິກໍາ, ຕະຫຼາດຂາຍຜົນຜະລິດກະສິກໍາ ແລະ ຫົວໜ່ວຍເສດຖະກິດຮ່ວມມືອື່ນ ຂອງປະຊາຊົນ ໂດຍປະສານສົມທົບກັບທ້ອງຖິ່ນ ເພື່ອເປັນຖານຂໍ້ມູນ ແລະ ບ່ອນອີງໃນການວາງແຜນ ການສົ່ງເສີມ ແລະ ກະຈາຍບົດຮຽນອອກສູ່ວົງກວ້າງ;
ປະສານສົມທົບກັບຜູ້ປະກອບການ ແລະ ພາກສ່ວນທີ່ກ່ຽວຂ້ອງ ເພື່ອໃຫ້ມີກົນໄກການບໍລິການແຫຼ່ງທຶນ, ສິນເຊື່ອ, ປັດໄຈການຜະລິດ, ເເນະນໍາເຕັກນິກວິຊາການ ແລະ ການເຂົ້າເຖິງຕະຫຼາດ ໃຫ້ແກ່ກຸ່ມ, ສະຫະ ກອນ ແລະ ຊາວກະສິກອນ ເພື່ອຍົກປະລິມານ ແລະ ຄຸນນະພາບ ຂອງຜົນຜະລິດກະສິກໍາ ຕາມທິດຫັນເປັນກົນຈັກທັນສະໄໝ ສີຂຽວ ແລະ ຍືນຍົງ;
ສ້າງແຜນງົບປະມານ, ກິດຈະກໍາ ແລະ ສະຫຼຸບລາຍງານຢ່າງເປັນປົກກະຕິ; ນໍາສະເໜີຂໍອະນຸມັດໂຄງການ, ງົບປະມານຂອງລັດ ແລະ ແຫຼ່ງທຶນອື່ນໆ ພ້ອມທັງຄຸ້ມຄອງນໍາໃຊ້ຊັບສິນ, ງົບປະມານ, ຊັບພະຍາກອນ ຂອງສູນ ໃຫ້ມີປະສິດທິພາບ, ໂປ່ງໃສ ແລະ ສາມາດກວດສອບໄດ້;
ປະສານງານ, ຮ່ວມມືກັບອົງການຈັດຕັ້ງທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ເພື່ອຍາດແຍ່ງການຊ່ວຍເຫຼືອ ທາງດ້ານງົບປະມານ ແລະ ເຕັກນິກວິຊາການ ບົນພື້ນຖານການຕົກລົງເຫັນດີຂອງກົມ;
ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ, ລະບຽບການ ແລະ ຕາມການມອບໝາຍຂອງກົມ.

ສູນ​ພັດ​ທະ​ນາ​ກະ​ສິ​ກຳ ໜອງ​ແດງ (ແຂວງສາ​ລະ​ວັນ​)

ສູນພັດທະນາກະສິກຳ ໜອງແດງ (ແຂວງສາລະວັນ)