ບົດບາດໜ້າທີ່ຂອງກົມສົ່ງເສີມກະສິກໍາ ແລະ ສະຫະກອນ

ທີ່ຕັ້ງ ແລະ ພາລະບົດບາດ

ກົມສົ່ງເສີມກະສິກຳ ແລະ ສະຫະກອນ ຂຽນເປັນຕົວອັກສອນຫຍໍ້ວ່າ “ກສກສ” ແມ່ນກົງຈັກການຈັດຕັ້ງໜຶ່ງຂອງກະຊວງກະສິກຳ ແລະ ປ່າໄມ້, ມີພາລະບົດບາດເປັນເສນາທິການໃຫ້ແກ່ກະຊວງກະສິກຳ ແລະ ປ່າໄມ້ ໃນການຄຸ້ມຄອງມະຫາພາກ ເປັນໃຈກາງໃນການສົ່ງເສີມການຜະລິດ, ການປຸງແຕ່ງ ແລະ ຈັດຕັ້ງກໍາລັງການຜະລິດ; ຖ່າຍທອດເຕັກນິກ, ເຕັກໂນໂລຊີ, ນະວັດຕະກຳ, ທັກສະກະສິກຳສະໄໝໃໝ່; ເຜີຍແຜ່ຂໍ້ມູນຂ່າວສານກ່ຽວກັບການປູກ, ການລ້ຽງ, ການນຳໃຊ້ກົນຈັກ, ການປຸງແຕ່ງ ແລະ ການຕະຫຼາດ; ພັດທະນາສູນ, ສະຖານີບໍລິການເຕັກນິກກະສິກຳ ໃຫ້ຮັບປະກັນການເຄື່ອນໄຫວປະຕິບັດໜ້າທີ່ ສົ່ງເສີມບໍລິການເຕັກນິກ ເພື່ອຍົກສະມັດຖະພາບການຜະລິດກະສິກຳໃຫ້ສູງຂຶ້ນ ທັງຮັບປະກັນ ດ້ານປະລິມານ ແລະ ຄຸນນະພາບຕາມທິດຫັນເປັນອຸດສາຫະກຳ, ສີຂຽວ ແລະ ຍືນຍົງ.

ໜ້າທີ່

ປະຕິບັດກົດໝາຍ, ດໍາລັດ, ນິຕິກໍາອື່ນຂອງຂັ້ນເທິງ ແລະ ນິຕິກໍາຕ່າງໆຂອງກະຊວງກະສິກໍາ ແລະ ປ່າໄມ້;
ຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍແນວທາງນະໂຍບາຍຂອງພັກ, ແຜນຍຸດທະສາດຂອງຂະແໜງ ກະສິກຳ ແລະ ປ່າໄມ້ ມາເປັນແຜນຍຸດທະສາດ, ແຜນງານ, ແຜນການ ແລະ ໂຄງການຂອງຕົນ ເພື່ອນຳສະເໜີລັດຖະມົນຕີ ກະຊວງກະສິກຳ ແລະ ປ່າໄມ້ ພິຈາລະນາອະນຸມັດ ພ້ອມທັງຈັດຕັ້ງປະຕິບັດ ແລະ ຄຸ້ມຄອງໃຫ້ໄດ້ຮັບຜົນດີ;
ຄົ້ນຄວ້າ, ສ້າງ ແລະ ປັບປຸງນິຕິກຳ ກ່ຽວກັບວຽກງານສົ່ງເສີມກະສິກຳ ແລະ ສະຫະກອນ, ກໍານົດຮູບແບບມາດຕະຖານ, ຫຼັກການ ແລະ ວິທີສ້າງຕັ້ງ ກຸ່ມ ແລະ ສະຫະກອນ ເພື່ອນໍາສະເໜີລັດຖະມົນຕີ ກະຊວງກະ ສິກຳ ແລະ ປ່າໄມ້ ພິຈາລະນາອະນຸມັດ ພ້ອມທັງເຜີຍແຜ່ໃຫ້ຂະແໜງການ ແລະ ພາກສ່ວນທີ່ກ່ຽວຂ້ອງຢ່າງທົ່ວເຖິງ;
ຈັດຕັ້ງ ແລະ ປັບປຸງສະຫະກອນ, ກຸ່ມການຜະລິດ, ຟາມ, ຫົວໜ່ວຍທຸລະກິດກະສິກໍາ ຕິດພັນກັບການສົ່ງ ເສີມ ແລະ ປັບປຸງຮູບແບບການຜະລິດເປັນສິນຄ້າ, ສະບຽງອາຫານ-ໂພຊະນາການ ດ້ວຍການຜະລິດແບບຜູກພັນຕາມສັນຍາ ໃຫ້ເປັນຂະບວນກວ້າງຂວາງ, ເຂັ້ມແຂງ ກ້າວໄປສູ່ການສ້າງເປັນສະຫະກອນທີ່ເຂັ້ມ ແຂງ ຢູ່ບັນດາເຂດຈຸດສຸມຜະລິດສະບຽງອາຫານ, ເຂດຈຸດສຸມຜະລິດເປັນສິນຄ້າ ເພື່ອຮັບໃຊ້ພາຍໃນທົດແທນການນໍາເຂົ້າ ແລະ ສົ່ງອອກ;
ຜະລິດແນວພັນເຂົ້າລຸ້ນສາມ, ແນວພັນພືດ, ແນວພັນສັດ, ແນວພັນສັດນໍ້າທີ່ດີ ຢູ່ບັນດາສູນທີ່ຂຶ້ນກັບກົມ ພ້ອມທັງສົ່ງເສີມ ແລະ ຂະຫຍາຍເຄືອຂ່າຍຜະລິດແນວພັນດັ່ງກ່າວ ຂອງກຸ່ມ, ຄອບຄົວ, ຜູ້ປະກອບການ ເພື່ອຕອບສະໜອງແນວພັນໃຫ້ແກ່ການຜະລິດສິນຄ້າຮັບໃຊ້ພາຍໃນ ທົດແທນການນໍາເຂົ້າ ແລະ ຜະລິດສິນຄ້າທີ່ມີຕະຫຼາດ ມີສັນຍາແລ້ວເພື່ອສົ່ງອອກ ດ້ວຍການສ້າງກົນໄກຮ່ວມມືສຳພັນເສດຖະກິດ ລະຫວ່າງ ພາກລັດ, ກຸ່ມການຜະລິດ, ສະຫະກອນ ແລະ ຫົວໜ່ວຍຜູ້ປະກອບການ ໃຫ້ກວ້າງຂວາງ ແລະ ມີຄຸນນະ ພາບ;
ບໍລິການ ແລະ ຖ່າຍທອດ ເຕັກນິກ, ເຕັກໂນໂລຊີ, ນະວັດຕະກໍາ ແລະ ທັກສະກະສິກຳສະໄໝໃໝ່ ເຂົ້າໃນການປູກ, ການລ້ຽງ, ການປຸງແຕ່ງ ແລະ ການຕະຫຼາດ ດ້ວຍການນຳໃຊ້ຜົນສຳເລັດທາງດ້ານວິທະຍາ ສາດ, ອຸປະກອນ, ກົນຈັກກະສິກຳ, ວິທີການກະເສດສຸມແບບປະສົມປະສານ ເພື່ອຍົກສະມັດຖະພາບ, ຄຸນນະພາບຂອງຜົນຜະລິດ ແລະ ມີໂພຊະນາການ ຕາມຫຼັກການກະສິກໍາສະອາດ, ສີຂຽວ ແລະ ຍືນຍົງ;
ຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາໂຮງງານປຸງແຕ່ງຜົນຜະລິດກະສິກໍາຂະໜາດນ້ອຍ ລະດັບຄອບ ຄົວ, ກຸ່ມ, ສະຫະກອນ ພ້ອມທັງສົ່ງເສີມເຕັກນິກການອົບ, ຕາກ, ຄັດແຍກ, ຈັດເກຣດ, ຫຸ້ມຫໍ່ ແລະ ແປຮູບ-ປຸງລົດ ຜົນຜະລິດກະສິກຳ ເພື່ອສ້າງມູນຄ່າເພີ່ມ ໄດ້ມາດຕະຖານ ແລະ ຄວາມຕ້ອງການຂອງຕະ ຫຼາດ, ມີໂພຊະນາການ, ສະອາດ ແລະ ປອດໄພ ພ້ອມທັງສ້າງເງື່ອນໄຂເອື້ອອຳນວຍການສ້າງຍີ່ຫໍ້ກາ ໝາຍສິນຄ້າກະສິກຳ;
ສ້າງກົນໄກຄຸ້ມຄອງ ແລະ ນຳໃຊ້ກອງທຶນຂອງກຸ່ມ, ສະຫະກອນ ແລະ ບັນດາຫົວໜ່ວຍເສດຖະກິດຮ່ວມມື ຂອງປະຊາຊົນ ໃຫ້ມີຄວາມເຂັ້ມແຂງ ແລະ ຢືນຍົງ ດ້ວຍການກໍານົດ ຮູບແບບ, ຫຼັກການ ແລະ ນິຕິ ກຳຕ່າງໆ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດ ແລະ ການຕິດຕາມກວດກາ; ເກັບກໍາຂຶ້ນບັນຊີ, ຂຶ້ນທະບຽນກຸ່ມການຜະລິດ ແລະ ສະຫະກອນ ພ້ອມທັງຊຸກຍູ້ຕິດຕາມ ແລະ ກວດກາການເຄື່ອນໄຫວຂອງກຸ່ມການຜະລິດ ແລະ ສະຫະກອນ ໃຫ້ມີປະສິດທິຜົນ;
ສ້າງຖານຂໍ້ມູນຂ່າວສານການສົ່ງເສີມໃນຮູບແບບ ເອກະສານ ແລະ ດີຈີຕອນ ເພື່ອໂຄສະນາເຜີຍແຜ່ ແລະ ບໍລິການເຕັກນິກການຜະລິດກະສິກຳ, ການປຸງແຕ່ງ, ການເຂົ້າເຖິງ ແຫຼ່ງທຶນ, ປັດໄຈການຜະລິດ ແລະ ການຕະຫຼາດ ພ້ອມທັງປະສານສົມທົບກັບພາກສ່ວນກ່ຽວຂ້ອງ ຈັດງານວາງສະແດງສິນຄ້າກະສິກໍາ ໃຫ້ກວ້າງຂວາງ;
ສ້າງຂີດຄວາມສາມາດຂອງນັກສົ່ງເສີມ ຂັ້ນສູນກາງ, ແຂວງ, ເມືອງ, ສູນ ແລະ ສະຖານີ ໃຫ້ມີຄວາມເຂັ້ມແຂງໃນການຖ່າຍທອດຄວາມຮູ້, ບໍລິການເຕັກນິກດ້ານການຜະລິດ, ການປຸງແຕ່ງກະສິກໍາ, ໂພຊະນາການ ແລະ ການຕະຫຼາດ ໃຫ້ແກ່ຊາວກະສິກອນ, ຜູ້ປະກອບການ ຕິດພັນກັບການສ້າງວິຊາການບ້ານ, ຄອບຄົວ, ຟາມ, ຫົວໜ່ວຍທຸລະກິດ, ກຸ່ມ ແລະ ສະຫະກອນຕົວແບບ ດ້ວຍການຝຶກອົບຮົມ, ສາທິດທັດສະນະສຶກສາແລກປ່ຽນບົດຮຽນ ຢູ່ພາຍໃນ ແລະ ຕ່າງປະເທດ;
ພັດທະນາສູນ ທີ່ຂຶ້ນກັບໂຄງປະກອບການຈັດຕັ້ງຂອງກົມ ໃຫ້ຮັບປະກັນການເຄື່ອນໄຫວຕາມບົດບາດ ໜ້າທີ່ ດ້ວຍການປະກອບທຶນ, ຫັນກິດຈະກໍາຂອງບັນດາໂຄງການ, ວິຊາການທີ່ມີຄວາມຮູ້ຄວາມສາມາດ, ວັດຖຸ-ເຕັກນິກ, ເຕັກໂນໂລຊີ, ນະວັດຕະກໍາ ແລະ ທັກສະກະສິກໍາສະໄໝໃໝ່ ພ້ອມທັງໃຫ້ມີເຄືອຂ່າຍ ສໍາພັນດ້ານເຕັກນິກວິຊາການກັບ ບັນດາສູນ, ສະຖານີບໍລິການເຕັກນິກ ຂອງແຂວງ, ເມືອງ ເພື່ອເປັນບ່ອນບໍລິການເຕັກນິກ, ສາທິດ ແລະ ຮຽນຮູ້ ໃຫ້ແກ່ຊາວກະສິກອນ, ຜູ້ປະກອບການ, ນັກສຶກສາ ແລະ ສັງຄົມ;
ຊຸກຍູ້ ບັນດາພະແນກກະສິກໍາ ແລະ ປ່າໄມ້ ແຂວງ/ນະຄອນຫຼວງວຽງຈັນ, ຫ້ອງການກະສິກໍາ ແລະ ປ່າໄມ້ ເມືອງ/ນະຄອນ ສ້າງ ແລະ ພັດທະນາສູນບໍລິການເຕັກນິກກະສິກໍາຂັ້ນແຂວງ, ສະຖານີບໍລິການ ເຕັກນິກກະສິກໍາ ຂັ້ນເມືອງ ດ້ວຍການປະກອບບຸກຄະລາກອນທີ່ມີຄວາມຮູ້ຄວາມສາມາດ, ງົບປະມານ ແລະ ຫັນກິດຈະກໍາຂອງບັນດາໂຄງການ, ວັດຖຸ-ອຸປະກອນດ້ານເຕັກນິກ, ເຕັກໂນໂລຊີ, ນະວັດຕະກໍາ ແລະ ທັກສະກະສິກໍາສະໄໝໃໝ່ ເພື່ອເປັນບ່ອນບໍລິການເຕັກນິກ, ສາທິດ ແລະ ຮຽນຮູ້ ໃຫ້ແກ່ຊາວກະສິກອນ, ຜູ້ປະກອບການ, ນັກສຶກສາ ແລະ ສັງຄົມ;
ປະສານສົມທົບ ແລະ ຮ່ວມມືກັບ ຫ້ອງການ, ບັນດາກົມ, ສະຖາບັນ, ບັນດາວິທະຍາໄລກະສິກຳ ແລະ ປ່າໄມ້, ຫົວໜ່ວຍວິຊາການລະດັບສອງ ອ້ອມຂ້າງກະຊວງກະສິກຳ ແລະ ປ່າໄມ້, ສະຖາບັນການສຶກສາ, ກະຊວງທີ່ກ່ຽວຂ້ອງ ແລະ ຄູ່ຮ່ວມພັດທະນາທັງພາຍໃນ ແລະ ຕ່າງປະເທດ ເພື່ອສ້າງໂຄງການພັດທະນາ ແລະ ຍາດແຍ່ງເອົາການຊ່ວຍເຫຼືອທາງດ້ານເຕັກນິກວິຊາການ ແລະ ທຶນ ເຂົ້າໃນການຈັດຕັ້ງປະຕິບັດບັນດາແຜນງານ, ແຜນການ ແລະ ໂຄງການໃນຂົງເຂດວຽກງານສົ່ງເສີມກະສິກຳ ແລະ ສະຫະກອນ;
ຄຸ້ມຄອງ ແລະ ຈັດຕັ້ງປະຕິບັດ ບັນດາໂຄງການງົບປະມານຂອງລັດ ແລະ ໂຄງການຮ່ວມມືກັບຕ່າງ ປະເທດ ກ່ຽວກັບວຽກງານສົ່ງເສີມ ແລະ ສະຫະກອນ ໃຫ້ໄປຕາມວຽກຈຸດສຸມຂອງກະຊວງ, ວຽກຈຸດສຸມຂອງລັດຖະບານໃນແຕ່ລະໄລຍະ ທັງຖືກຕ້ອງ ແລະ ສອດຄ່ອງກັບກົດໝາຍ ແລະ ລະບຽບການ; ມີການຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດ ໃຫ້ໄດ້ຜົນສຳເລັດເປັນຢ່າງດີ;
ຄົ້ນຄວ້າ, ນຳສະເໜີ ແລະ ປັບປຸງກົງຈັກການຈັດຕັ້ງ ພ້ອມທັງກຳນົດຕຳແໜ່ງງານໃຫ້ຄົບຖ້ວນ, ຄຸ້ມຄອງພະນັກງານ-ລັດຖະກອນ ແລະ ສ້າງແຜນການບໍາລຸງກໍ່ສ້າງພະນັກງານ-ລັດຖະກອນຂອງຕົນ ບົນພື້ນຖານຄວາມສະເໝີພາບບົດບາດຍິງ-ຊາຍ ໂດຍປະຕິບັດນະໂຍບາຍ, ກົດໝາຍ ແລະ ລະບຽບການທີ່ໄດ້ກຳນົດໄວ້; ປັບປຸງແບບແຜນວິທີເຮັດວຽກ, ກົນໄກການຄຸ້ມຄອງບໍລິຫານຂອງກົມໃຫ້ມີປະສິດທິພາບ;
ສົ່ງເສີມ ແລະ ເຊື່ອມໂຍງວຽກງານຄວາມກ້າວໜ້າຂອງແມ່ຍິງ ແລະ ແມ່-ເດັກ ເຂົ້າໃນວຽກງານສົ່ງເສີມກະສິກຳ ແລະ ສະຫະກອນ ແຕ່ສູນກາງລົງຮອດທ້ອງຖິ່ນ;
ຂຶ້ນແຜນງົບປະມານ ພ້ອມທັງຕິດຕາມກວດກາ, ສະຫຼຸບ, ລາຍງານ ແລະ ຖອດຖອນບົດຮຽນການຈັດຕັ້ງປະຕິບັດແຜນງານ, ແຜນການ ແລະ ໂຄງການຕ່າງໆ ທີ່ກົມຮັບຜິດຊອບໃຫ້ເປັນລະບົບ;
ຄຸ້ມຄອງ ແລະ ນຳໃຊ້ຊັບສົມບັດ, ວັດຖຸສິ່ງຂອງ, ພາຫະນະ ແລະ ງົບປະມານ ທີ່ໄດ້ຮັບອະນຸມັດ ຢ່າງມີຄວາມຮັບຜິດຊອບ ແລະ ມີປະສິດທິຜົນສູງ;
ສະຫຼຸບ, ລາຍງານ ວຽກງານຂອງຕົນ ໃຫ້ລັດຖະມົນຕີ ຊາບ ແລະ ເພື່ອຊີ້ນໍາ;
ປະຕິບັດໜ້າທີ່ອື່ນ ຕາມທີ່ກໍານົດໄວ້ໃນນິຕິກໍາອື່ນ ແລະ ການມອບໝາຍຂອງລັດຖະມົນຕີ, ຮອງລັດຖະ ມົນຕີ ຜູ້ຊີ້ນໍາ.

ຂອບເຂດສິດ

ນໍາສະເໜີຮ່າງຍຸດທະສາດ, ແຜນງານ, ແຜນການ, ໂຄງການຈັດຕັ້ງປະຕິບັດວາລະແຫ່ງຊາດຂອງກົມ ແລະ ຂະແໜງການ; ຄົ້ນຄວ້າກໍານົດຮູບແບບ, ມາດຕະຖານ, ຫຼັກການ ແລະ ວິທີສ້າງຕັ້ງກຸ່ມ ແລະ ສະຫະກອນ ຕໍ່ກະຊວງກະສິກຳ ແລະ ປ່າໄມ້ ພິຈາລະນາອະນຸມັດ;
ອອກຂໍ້ຕົກລົງ, ອອກແຈ້ງການ, ຄໍາແນະນໍາ, ຄູ່ມືວິຊາການ, ໜັງສືສະເໜີເຖິງຫ້ອງການ, ບັນດາກົມ, ສະຖາບັນ ແລະ ຫົວໜ່ວຍວິຊາການລະດັບສອງອ້ອມຂ້າງກະຊວງ ແລະ ຂະແໜງການຢູ່ທ້ອງຖິ່ນ ເພື່ອຈັດຕັ້ງປະຕິບັດວຽກງານສົ່ງເສີມ ແລະ ສະຫະກອນ ຂອງຂະແໜງກະສິກໍາ ແລະ ປ່າໄມ້ ໃຫ້ໄດ້ຮັບຜົນສຳ ເລັດຕາມຄາດໝາຍ ທີ່ວາງໄວ້ ພ້ອມທັງກວດກາຕິດຕາມ ຊຸກຍູ້ການຈັດຕັ້ງປະຕິບັດໃຫ້ໄດ້ຮັບຜົນດີ;
ຊີ້ນຳ, ຄຸ້ມຄອງຕາມສາຍຕັ້ງທາງດ້ານ ເຕັກນິກ, ວິຊາການໂດຍມີການແບ່ງຂັ້ນ, ແບ່ງຄວາມຮັບຜິດຊອບ ແລະ ແບ່ງສິດໃນການຕົກລົງບັນຫາ ຢ່າງລະອຽດຈະແຈ້ງ;
ຄົ້ນຄວ້າ ແລະ ນຳສະເໜີ ການປັບປຸງກົງຈັກການຈັດຕັ້ງ, ກຳນົດຕຳແໜ່ງງານ, ບັນຈຸ-ສັບຊ້ອນ, ແຕ່ງຕັ້ງ ແລະ ປະຕິບັດນະໂຍບາຍຕໍ່ບຸກຄະລາກອນ ຕາມການແບ່ງຂັ້ນຄຸ້ມຄອງ ແລະ ທິດກະທັດຮັດ, ເຂັ້ມແຂງ ແລະ ມີປະສິດທິພາບ ທີ່ກົດໝາຍ ແລະ ລະບຽບການກໍານົດໄວ້;
ຮຽກໂຮມພະນັກງານນໍາພາ-ຄຸ້ມຄອງ ແລະ ລັດຖະກອນວິຊາການໃນຄວາມຮັບຜິດຊອບຂອງຕົນ; ເຂົ້າຮ່ວມກອງປະຊຸມ ຫຼື ລາຍງານສ່ອງແສງວຽກງານເປັນແຕ່ລະໄລຍະ; ຈັດ ຫຼື ເຂົ້າຮ່ວມງານວາງສະແດງສິນ ຄ້າກະສິກໍາ ແລະ ຕະຫຼາດນັດ, ຝຶກອົບຮົມ, ສໍາມະນາດ້ານວິຊາການ ແລະ ລົງເຮັດວຽກຢູ່ທ້ອງຖິ່ນຕາມຄວາມຮຽກຮ້ອງຕ້ອງການ ຂອງໜ້າທີ່ວຽກງານທີ່ໄດ້ກໍານົດໃນລະບຽບການກ່ຽວຂ້ອງ;
ຄົ້ນຄວ້າ ແລະ ປະກອບຄໍາເຫັນ ກ່ຽວກັບການລົງທຶນພາຍໃນ ແລະ ຕ່າງປະເທດ ໃນດ້ານກະສິກໍາ, ປ່າໄມ້ ແລະ ພັດທະນາຊົນນະບົດ ບົນພື້ນຖານກົດໝາຍ ແລະ ລະບຽບການ;
ຄຸ້ມຄອງ ແລະ ນໍາໃຊ້ງົບປະມານ, ຊັບສິນຂອງລັດ, ການຈັດຕັ້ງປະຕິບັດພາລະບົດບາດ ແລະ ໜ້າທີ່ຄວາມຮັບຜິດຊອບຂອງຕົນຕາມກົດໝາຍ ແລະ ລະບຽບການກຳນົດໄວ້;
ພົວພັນ, ຮ່ວມມື ແລະ ເຊັນສັນຍາກັບອົງການຈັດຕັ້ງຕ່າງໆ ທັງພາຍໃນ ແລະ ຕ່າງປະເທດຕາມການຕົກ ລົງ ແລະ ມອບໝາຍຂອງລັດຖະມົນຕີ;
ປະຕິບັດສິດອື່ນ ຕາມທີ່ໄດ້ກຳນົດໄວ້ໃນກົດໝາຍ, ລະບຽບການ ແລະ ຕາມການມອບໝາຍຂອງລັດ ຖະມົນຕີ.

ໂຄງປະກອບກົງຈັກ

ພະແນກບໍລິຫານ ແລະ ແຜນການ;
ພະແນກຂໍ້ມູນຂ່າວສານການສົ່ງເສີມ ແລະ ເຊື່ອມໂຍງຕະຫຼາດ;
ພະແນກສົ່ງເສີມ ກຸ່ມ, ສະຫະກອນ ແລະ ກອງທຶນ;
ພະແນກສົ່ງເສີມເຕັກນິກການຜະລິດ ແລະ ກົນຈັກກະສິກຳ;
ພະແນກສົ່ງເສີມການຜະລິດ ແລະ ນໍາໃຊ້ແນວພັນ;
ພະແນກສົ່ງເສີມການປຸງແຕ່ງ ແລະ ໂພຊະນາການ;
ສູນພັດທະນາກະສິກຳ 30 ເຮັກຕາ (ແຂວງ ໄຊຍະບູລີ);
ສູນພັດທະນາກະສິກຳ ປາກແຈ້ງ (ແຂວງ ວຽງຈັນ);
ສູນພັດທະນາກະສິກຳ ນ້ຳປາຈາດ (ແຂວງ ໄຊສົມບູນ);
ສູນພັດທະນາກະສິກຳ ເຊບັ້ງໄຟ (ແຂວງ ຄໍາມ່ວນ);
ສູນພັດທະນາກະສິກຳ ຫຼັກ 35 (ແຂວງ ສະຫວັນນະເຂດ);
ສູນພັດທະນາກະສິກຳ ໜອງແດງ (ແຂວງ ສາລະວັນ);
ສູນພັດທະນາກະສິກຳ ໜອງແຫ້ວ (ນະຄອນຫຼວງວຽງຈັນ).

ດາວໂຫຼດຟາຍ