ພະແນກສົ່ງເສີມການຜະລິດ ແລະ ນໍາໃຊ້ແນວພັນ

ພະແນກສົ່ງເສີມການຜະລິດ ແລະ ນໍາໃຊ້ແນວພັນ ມີໜ້າທີ່ ດັ່ງນີ້:

ຜັນຂະຫຍາຍແຜນຍຸດທະສາດການພັດທະນາວຽກງານຂອງກົມ ມາເປັນແຜນການ ແລະ ໂຄງການລະ ອຽດ ເພື່ອຈັດຕັ້ງປະຕິບັດ ຕາມບົດບາດໜ້າທີ່ຂອງຕົນໃຫ້ປະກົດຜົນເປັນຈິງ;
ສ້າງກົນໄກ, ວິທີການຜະລິດ, ການກວດສອບ ແລະ ການສະໜອງແນວພັນເຂົ້າລຸ້ນສາມ, ແນວພັນພືດ ແລະ ສັດທີ່ດີ ດ້ວຍການສ້າງຄູ່ມື, ແຜ່ນພັບ, ໂປສ໌ເຕີ, ວີດີໂອ ແລະ ສື່ຕ່າງໆ ໃຫ້ມີຄວາມສອດຄ່ອງກັບເງື່ອນໄຂ ແລະ ທ່າແຮງ ຂອງແຕ່ລະເຂດຜະລິດ ໂດຍພົວພັນປະສານສົມທົບກັບພາກສ່ວນທີ່ກ່ຽວຂ້ອງ ໃນຂັ້ນສູນກາງ ແລະ ທ້ອງຖິ່ນ ເພື່ອເກັບກໍາສັງລວມຂໍ້ມູນດ້ານແນວພັນ; ຕອບສະໜອງໃຫ້ແກ່ການກໍານົດແຜນ ແລະ ການຈັດຕັ້ງປະຕິບັດແຜນງານສົ່ງເສີມການຜະລິດ ເພື່ອຄໍ້າປະກັນດ້ານສະບຽງອາຫານ ແລະ ການຜະລິດເປັນສິນຄ້າ;
ຊຸກຍູ້, ສົ່ງເສີມ ການພັດທະນາພື້ນຖານໂຄງລ່າງດ້ານເຕັກນິກການຜະລິດແນວພັນເຂົ້າລຸ້ນສາມ, ແນວພັນພືດ, ສັດ ແລະ ສັດນໍ້າ ທີ່ດີ ຕາມທ່າແຮງ ແລະ ເງື່ອນໄຂ ຂອງທ້ອງຖິ່ນຢ່າງເປັນລະບົບ;
ຊຸກຍູ້ບັນຂະແໜງ, ສູນ, ສະຖານີ, ຜູ້ປະກອບການ, ຊາວກະສິກອນ, ກຸ່ມ ແລະ ສະຫະກອນ ທີ່ຜະລິດແນວພັນເຂົ້າລຸ້ນສາມ, ແນວພັນພືດ, ແນວພັນສັດ, ແນວພັນສັດນໍ້າ ທີ່ດີ ເພື່ອສະໜອງ ໃຫ້ແກ່ການຜະ ລິດພາຍໃນ ເພື່ອທົດແທນການນໍາເຂົ້າ ແລະ ຜະລິດສິນຄ້າ ໃຫ້ໄດ້ມາດຕະຖານ;
ສົ່ງເສີມ ແລະ ເອື້ອອຳນວຍການຜະລິດແນວພັນເຂົ້າລຸ້ນສາມ, ແນວພັນພືດ, ແນວພັນສັດ ແລະ ແນວພັນສັດນໍ້າທີ່ດີ ດ້ວຍການສ້າງກົນໄກຮ່ວມມືສຳພັນເສດຖະກິດ ລະຫວ່າງ ພາກລັດ, ກຸ່ມການຜະລິດ, ສະຫະ ກອນ ແລະ ຫົວໜ່ວຍຜູ້ປະກອບການ ໃຫ້ກວ້າງຂວາງ ເພື່ອນໍາໃຊ້ຢ່າງສອດຄ່ອງ ຕາມສະພາບເງື່ອນໄຂ ແລະ ທ່າແຮງ ຂອງແຕ່ລະເຂດການຜະລິດ ເຮັດໃຫ້ຂະບວນການຜະລິດສະບຽງ ແລະ ສິນຄ້າ ສາມາດບັນ ລຸໄດ້ຕາມຄາດໝາຍແຜນການທີ່ວາງໄວ້;
ປະສານສົມທົບແໜ້ນກັບ ສະຖາບັນກະສິກໍາ, ປ່າໄມ້ ແລະ ພັດທະນາຊົນນະບົດ, ກົມຄຸ້ມຄອງ ແລະ ພັດ ທະນາທີ່ດິນ, ກົມປູກຝັງ, ກົມລ້ຽງສັດ ແລະ ການປະມົງ ແລະ ພາກສ່ວນກ່ຽວຂ້ອງ ເພື່ອຂະຫຍາຍເຄືອຂ່າຍການຜະລິດແນວພັນເຂົ້າລຸ້ນສາມ, ແນວພັນພືດ, ແນວພັນສັດ ແລະ ແນວພັນສັດນໍ້າທີ່ດີ ໃຫ້ຖືກ ຕ້ອງຕາມຂະບວນການຂັ້ນຕອນດ້ານວິຊາການ, ມີການກວດສອບ ແລະ ຢັ້ງຢືນຄຸນນະພາບ;
ເກັບກໍາ, ສັງລວມ ການນໍາໃຊ້ພື້ນຖານໂຄງລ່າງ ແລະ ເຄື່ອງມືອຸປະກອນທາງດ້ານເຕັກນິກ ເຂົ້າໃນການຜະລິດແນວພັນ ແລະ ຜະລິດສິນຄ້າ ທີ່ໃຫ້ຕົ້ນທຶນການຜະລິດຕໍ່າ ພ້ອມທັງຕິດຕາມ, ແນະນໍາທຸກຂັ້ນຕອນ ຂອງຕ່ອງໂສ້ການຜະລິດ ແລະ ການສະໜອງແນວພັນ;
ຊຸກຍູ້ການສ້າງລະບົບ, ການຕອບໂຕ້ແກ້ໄຂຜົນກະທົບໄພພິບັດ ດ້ວຍການສ້າງຄັງແຮສຳຮອງແນວພັນ ໃນບັນດາເຂດຈຸດສຸມຜະລິດເປັນສິນຄ້າ, ສະບຽງອາຫານ ແລະ ເຂດມີຄວາມສ່ຽງ;
ຊຸກຍູ້, ສົ່ງເສີມ ການນໍາໃຊ້ຄວາມຫຼາກຫຼາຍຂອງແນວພັນ ເພື່ອການພັດທະນາແບບຢືນຍົງ ພ້ອມທັງນໍາໃຊ້ແນວພັນທີ່ມີຄວາມທົນທານຕໍ່ການລະບາດພະຍາດ, ແມງໄມ້, ຄວາມແຫ້ງແລ້ງ, ນ້ຳຖ້ວມ ແລະ ການປ່ຽນແປງຂອງດິນຟ້າອາກາດ;
ປະສານງານ, ຮ່ວມມື ກັບອົງການຈັດຕັ້ງທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ເພື່ອຍາດແຍ່ງການຊ່ວຍເຫຼືອທາງດ້ານງົບປະມານ ແລະ ເຕັກນິກວິຊາການ;
ຄົ້ນຄວ້າ, ເກັບກຳຂໍ້ມູນ, ສັງລວມ, ສະຫຼຸບລາຍງານວຽກງານສົ່ງເສີມການຜະລິດ ແລະ ນໍາໃຊ້ແນວພັນປະຈຳເດືອນ, 3 ເດືອນ, 6 ເດືອນ, 9 ເດືອນ, ປະຈຳປີ, ກາງສະໄໝ ແລະ 5 ປີ ໃຫ້ຖືກຕ້ອງ, ຄົບຖ້ວນ, ເປັນປົກກະຕິ ແລະ ທັນເວລາ;

ປະຕິບັດໜ້າທີ່ອື່ນ ຕາມກົດໝາຍ, ລະບຽບການ ແລະ ການມອບໝາຍ ຂອງຂັ້ນເທິງ.