ພະແນກສົ່ງເສີມ ກຸ່ມ ແລະ ສະຫະກອນ

ພະແນກສົ່ງເສີມກຸ່ມ, ສະຫະກອນ ແລະ ກອງທຶນ ມີໜ້າທີ່ ດັ່ງນີ້:

ຜັນຂະຫຍາຍແຜນຍຸດທະສາດການພັດທະນາວຽກງານຂອງກົມ ມາເປັນແຜນການ ແລະ ໂຄງການລະ ອຽດ ເພື່ອຈັດຕັ້ງປະຕິບັດ ຕາມບົດບາດໜ້າທີ່ຂອງຕົນໃຫ້ປະກົດຜົນເປັນຈິງ;
ຄົ້ນຄວ້າ, ນຳສະເໜີ ສ້າງ ແລະ ປັບປຸງນິຕິກຳ, ລະບຽບການ, ຫຼັກການ ແລະ ວິທີການ ກ່ຽວກັບການສ້າງ ຕັ້ງ ແລະ ຄຸ້ມຄອງ ກຸ່ມ ແລະ ສະຫະກອນ ແລະ ຮູບແບບການຈັດຕັ້ງຮ່ວມມືອື່ນ ໃຫ້ມີຄວາມສອດຄ່ອງ ແລະ ສາມາດເຊື່ອມໂຍງກັບສາກົນ ພ້ອມທັງເຜີຍແຜ່ອອກສູ່ວົງກວ້າງ;
ຈັດຕັ້ງ ແລະ ປັບປຸງກຸ່ມການຜະລິດ ແລະ ສະຫະກອນ ຕິດພັນກັບການສົ່ງເສີມ ແລະ ປັບປຸງຮູບແບບການຜະລິດເປັນສິນຄ້າ, ສະບຽງອາຫານ-ໂພຊະນາການ ດ້ວຍການຜະລິດແບບຜູກພັນຕາມສັນຍາ ໃຫ້ເປັນຂະບວນກວ້າງຂວາງ, ເຂັ້ມແຂງ ກ້າວໄປສູ່ການສ້າງເປັນສະຫະກອນທີ່ເຂັ້ມແຂງ ຢູ່ບັນດາເຂດຈຸດສຸມຜະລິດສະບຽງອາຫານ, ເຂດຈຸດສຸມຜະລິດເປັນສິນຄ້າ ເພື່ອຮັບໃຊ້ພາຍໃນທົດແທນການນໍາເຂົ້າ ແລະ ສົ່ງອອກ;
ເອື້ອອໍານວຍການຜັນຂະຫຍາຍ ແລະ ປະຕິບັດ ນິຕິກໍາ, ລະບຽບການ ໃນການຄຸ້ມຄອງ ກຸ່ມ, ສະຫະກອນ ແລະ ຫົວໜ່ວຍເສດຖະກິດຮ່ວມມືອື່ນ ຂອງປະຊາຊົນ ໃຫ້ມີຄວາມເຂັ້ມແຂງ ດ້ວຍການຝຶກອົບຮົມ ແລະ ຕິດຕາມກວດກາການຈັດຕັ້ງປະຕິບັດຢ່າງເປັນລະບົບ;
ກຳນົດຮູບແບບ, ວິທີການ, ເຄື່ອງມື ແລະ ບົດແນະນຳ ໃນການຄຸ້ມຄອງ, ການອອກໃບອະນຸຍາດສ້າງຕັ້ງກຸ່ມ ແລະ ການຂື້ນທະບຽນສະຫະກອນ, ການສະຫຼຸບລາຍງານຂອງກຸ່ມ, ສະຫະກອນ;
ຊຸກຍູ້ການຈັດຕັ້ງກຸ່ມການຜະລິດ, ສະຫະກອນ ແລະ ຫົວໜ່ວຍທຸລະກິດກະສິກໍາ; ເກັບກໍາຂຶ້ນບັນຊີ, ຂຶ້ນທະບຽນກຸ່ມການຜະລິດ, ສະຫະກອນ ແລະ ຫົວໜ່ວຍທຸລະກິດ ພ້ອມທັງສ້າງຄວາມເຂັ້ມແຂງ, ຊຸກຍູ້ຕິດຕາມ ແລະ ກວດກາການເຄື່ອນໄຫວ ໃຫ້ມີປະສິດທິຜົນ;
ເກັບກຳ, ຂຶ້ນບັນຊີ ກຸ່ມ ແລະ ສະຫະກອນ, ຮູບແບບການຈັດຕັ້ງຮ່ວມມືອື່ນໃນທົ່ວປະເທດ ເພື່ອຄຸ້ມຄອງຢ່າງລວມສູນ ພ້ອມທັງສ້າງຖານຂໍ້ມູນ, ສັງລວມລາຍງານ ແລະ ສະໜອງຂໍ້ມູນ ໃຫ້ຂັ້ນເທິງ ແລະ ພາກ ສ່ວນທີ່ກ່ຽວຂ້ອງ;
ກຳນົດຫຼັກສູດ ແລະ ຈັດຝຶກອົບຮົມ ສ້າງຄວາມເຂັ້ມແຂງໃຫ້ພະນັກງານຢູ່ຂັ້ນສູນກາງ ແລະ ທ້ອງຖິ່ນ ກ່ຽວກັບການຈັດຕັ້ງ, ການເຄື່ອນໄຫວ ແລະ ການຄຸ້ມຄອງ ກຸ່ມຜະລິດ ແລະ ສະຫະກອນ ໃຫ້ເປັນລະບົບໃນທົ່ວປະເທດ;
ເອື້ອອໍານວຍ, ສ້າງເງື່ອນໄຂໃຫ້ ກຸ່ມ, ສະຫະກອນ, ແລະ ຮູບແບບການຈັດຕັ້ງຮ່ວມມືອື່ນ ສາມາດເຂົ້າເຖິງແຫຼ່ງທຶນ, ເຕັກນິກ, ປັດໄຈການຜະລິດ ແລະ ຕະຫຼາດ ດ້ວຍການສ້າງຂໍ້ແນະນໍາ, ຝຶກອົບຮົມ ແລະ ທັດສະນະສຶກສາແລກປ່ຽນບົດຮຽນ ຢູ່ພາຍໃນ ແລະ ຕ່າງປະເທດ ແນໃສ່ໃຫ້ການເຄື່ອນໄຫວ ມີປະສິດ ທິພາບ;
ສົມທົບ ແລະ ຊຸກຍູ້ ບັນດາຂະແໜງການທີ່ກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ ເພື່ອສ້າງຄວາມເຂັ້ມ ແຂງໃນການຜະລິດເປັນສິນຄ້າຂອງກຸ່ມການຜະລິດຢູ່ຈຸດສຸມພັດທະນາ ແລະ ບ່ອນທີ່ມີເງື່ອນໄຂກ້າວເປັນສະຫະກອນທີ່ເຂັ້ມແຂງ;
ຕິດຕາມ, ຊຸກຍູ້ການຈັດຕັ້ງປະຕິບັດ ບົດບາດໜ້າທີ່, ໝາກຜົນການຜະລິດ ແລະ ການດໍາເນີນກິດຈະການ ເພື່ອສັງລວມ ສະເໜີປະຕິບັດນະໂຍບາຍ-ຍ້ອງຍໍ ໃຫ້ກຽດຕິຄຸນ ຕໍ່ບຸກຄົນ, ຫົວໜ່ວຍກຸ່ມ, ສະຫະກອນ, ກອງທຶນ ແລະ ຟາມ ທີ່ດີເດັ່ນ;
ປະສານງານ, ຮ່ວມມືກັບອົງການຈັດຕັ້ງທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ເພື່ອຍາດແຍ່ງການ ຊ່ວຍເຫຼືອທາງດ້ານງົບປະມານ ແລະ ເຕັກນິກວິຊາການ;
ຄົ້ນຄວ້າ, ເກັບກຳຂໍ້ມູນ, ສັງລວມ, ສະຫຼຸບລາຍງານວຽກງານສົ່ງເສີມ ກຸ່ມ ແລະ ສະຫະກອນ ປະຈຳເດືອນ, 3 ເດືອນ, 6 ເດືອນ, 9 ເດືອນ, ປະຈຳປີ, ກາງສະໄໝ ແລະ 5 ປີ ໃຫ້ຖືກຕ້ອງ, ຄົບຖ້ວນ, ເປັນປົກກະຕິ ແລະ ທັນເວລາ;
ປະຕິບັດໜ້າທີ່ອື່ນ ຕາມກົດໝາຍ, ລະບຽບການ ແລະ ການມອບໝາຍ ຂອງຂັ້ນເທິງ.